ភ្នំពេញ៖ នាយករដ្ឋមន្ត្រីម៉ាឡេស៊ីលោក Sri Ismal Sabri Yaakob គ្រោងនឹងមកបំពេញទស្សនកិច្ចនៅកម្ពុជានៅថ្ងៃទី២៤ ខែកុម្ភៈ ឆ្នាំ២០២២។ នេះបើតាមសេចក្ដីប្រកាសព័ត៌មាននៃសម័យប្រជុំពេញអង្គគណៈរដ្ឋមន្ត្រីថ្ងៃទី៤ ខែកុម្ភៈនេះ។

នៅក្នុងសេចក្តីប្រកាសព័ត៌មាននៃសម័យប្រជុំពេញអង្គគណៈរដ្ឋមន្ត្រី ថ្ងៃទី០៤ ខែកុម្ភៈ ឆ្នាំ២០២២នេះ នាយករដ្ឋមន្រ្តីកម្ពុជា សម្តេចតេជោ ហ៊ុន សែន បានលើកឡើងថា ការមកបំពេញទស្សនកិច្ចរបស់លោក Sri Ismal Sabri Yaakob គឺតបតាមការអញ្ចើញរបស់សម្តេចក្នុងជំនួបពិភាក្សាការងារតាមរយៈវីឌីអូអនឡាញកាលពីថ្ងៃទី២៥ ខែមករា ឆ្នាំ២០២២ កន្លងទៅនេះ។

គួររំលឹកដែរថា ក្នុងជំនួបរវាងសម្ដេចតេជោ និងនាយករដ្ឋមន្ត្រីម៉ាឡេស៊ីកាលពីចុងខែមករា លោក Sri Ismal Sabri Yaakob បានគាំទ្រចំពោះដំណើរទស្សនកិច្ចរបស់សម្ដេចតេជោ ទៅកាន់ប្រទេសមីយ៉ាន់ម៉ា ហើយក៏បានគាំទ្រជាថ្មីចំពោះប្រេសិតពិសេសក្នុងកិច្ចការមីយ៉ាន់ម៉ាផងដែរ៕